NDZAWULO YA VULULAMI NA NHLUVUKISO WA VUMBIWA
MILAWU YA NHUNGU YA BATHO PELE YA KU ENDLA NTIRHO
Hina eka Ndzawulo hi tiyimiserile ku rhangisa milawu leyi ya ?People First? handle ko heta nkarhi. Hi ta yi tirhisa ku fikelela swiyimo swa le henhla leswi amukelekaka na nkoka hi laha swi nga kotekaka hakona.
KU TSUNDZUXANA
Vaaki va fanele ku vutisiwa hi xiyimo na nkoka wa ntirho wa mfumo lowu va wu kumaka, kasi laha swi kotekaka, va fanele ku hlawula mintirho leyi va yi kumaka.
U fanele ku tiyisisa leswaku Ku tsundzuxana ku endliwa minkarhi hinkwayo na hi sisiteme ku pfuneta Hofisi ya wena ku tshama yi tiva swilaveko swa vaxavi va yona.
MIMPIMO YA NTIRHO
Vaaki va fanele ku tivisiwa leswaku i xiyimo xihi na nkoka wa ntirho leswi va nga ta swi kuma leswaku va tshama va tiva leswi va nga swi langutelaka.
U na vutihlamuleri na mfanelo yo hetiseka eka huvo yo endla milawu ku tirhisa pholisi ya Mfumo, hikokwalaho u fanele ku tiyisisa leswaku mintirho leyi endliwaka ya amukeleka eka vaxavi.
KU KUMEKA
Vaaki hinkwavo va fanele ku kuma mintirho leyi va yi lavaka hi ku ringana
U fanele ku boxa no veka swipakaniso swo ya emahlweni ku kumeka mintirho eka vanhu lava khale a va nga yi kumi, xik. Vatsoniwa. U fanele ku tiyisisa leswaku swiphiqo hinkwaswo swo kuma mintirho swa susiwa.
MAFUNDZHA
Vaaki va fanele ku khomiwa hi mafundzha no tekeriwa enhlokweni.
U fanele ku tiyisisa leswaku tikhodi ta matikhomele ta Ndzawulo ti katsa mimpimo ya ndlela leyi vaxavi va faneleke ku khomiwa hi yona
MAHUNGU
Vaaki va fanele ku nyikiwa mahungu lama hetisekeke no pfumala swihoxo hi mintirho ya mfumo leyi va faneleke ku yi kuma
Mahungu i xitirho xa nkoka eka muxavi ku tirhisa mfanelo ya yena yo kuma ntirho wa kahle. Tihofisi ti fanele ku nyika mahungu yo hetiseka, yo pfumala swihoxo no pfuxetiwa hi mintirho leyi ti yi endlaka.
KU TSHEMBEKA NO VA ERIVALENI
Vaaki va fanele ku tivisiwa hi matirhele ya Tihofisi ta Rixaka na Swifundzankulu, leswaku ti lava mali muni na leswaku i mani loyi a nga na vutihlamuleri.
A hi vaxavi va le handle ntsena lava faneleke ku kuma mahungu lama kambe na vatirhi va hofisi. Vulawuri byi fanele ku va erivaleni. U fanele ku nyika mahungu hi matirhele ya wena loko ya pimanisiwa na mimpimo yo antswisa ku endliwa ka ntirho, mahlayisele ya timali na ku engeteleka ka vuswikoti. Vuxokoxoko bya vatirhi na vatirhi va xiyimo xa le henhla a swi fanelanga ku va xihundla.
KU LULAMISA LESWI HOXEKEKE
Loko mimpimo ya ntirho leyi tshembisiweke yi nga fikeleriwangi, vaaki va fanele ku tivisiwa, hi ku nyika nhlamuselo yo hetiseka na xintshunxo xa xihatla no va kahle loko ku ri na swivilelo, vaaki va fanele ku kuma nhlamulo ya kahle.
Vuswikoti na ku tsakela ku lulamisa loko swilo swi nga fambi kahle swi na nkoka eka endlelo ro veka mimpimo. U fanele ku khutaza ku nyikiwa ka switsundzuxo eHofisini ya wena.
NTIRHO WA KAHLE
Mintirho ya mfumo yi fanele ku endliwa hi ndlela yo hlayisa mali no va kahle ku kota ku nyika vaaki ntirho wa kahle.
U ta fanela ku kuma tindhawu leti nga hlayisaka mali na ku antswisiwa ko endliwa ka ntirho loku nga ta hetelela hi ku hlayisa mali. U fanele ku tirhisa mali ya wena kahle.
Nawu lowu nga ta letela ntirho wa mfumo eka Ndzawulo ku ta va ku pfuna vanhu
Ku antswisa ku endliwa ka ntirho i xikongomelonkulu xa Ndzawulo
